Xəbər verdiyimiz kimi Maliyyə naziri Samir Şərifov tutduğu vəzifəsindən azad edilib.
Bu barədə Prezident İlham Əliyev Sərəncam imzalayıb.
Dövlət başçısının imzaladığı digər Sərəncamla o, Azərbaycan Baş nazirinin müavini təyin olunub.
Samir Şərifov kimdir?
Samir Rauf oğlu Şərifov 7 sentyabr 1961-ci ildə anadan olub. 1983-cü ildə Kiyev Dövlət Universitetinin Beynəlxalq əlaqələr və beynəlxalq hüquq fakültəsinin Beynəlxalq iqtisadi əlaqələr bölməsini bitirib və magistr dərəcəsi alıb.
1983-1991-ci illərdə SSRİ-nin xarici iqtisadi əlaqələr sistemində, o cümlədən Yəmən Xalq Demokratik Respublikasında iqtisadçı kimi fəaliyyət göstərib. 1991-1995-ci illərdə Azərbaycan Respublikasının Xarici İşlər Nazirliyinin Beynəlxalq İqtisadi Əlaqələr İdarəsində şöbə müdiri və idarə rəisinin müavini vəzifələrində çalışıb. 1995-2001-ci illərdə Azərbaycan Respublikası Milli Bankında departament direktoru və baş direktor olub. 2001-2006-cı illərdə Azərbaycan Respublikası Dövlət Neft Fondunun İcraçı Direktoru vəzifəsini icra edib. 2003-2006-cı illərdə Mineral Ehtiyatların Hasilatı ilə Məşğul olan Sənaye Sahələrində Şəffaflıq Təşəbbüsü üzrə Hökumət Komissiyasının sədri olub.
18 aprel 2006-cı ildə Azərbaycan Respublikasının maliyyə naziri təyin edilib.
Bu vəzifədə 2025-ci ilə qədər çalışıb.
Samir Şərifov həmçinin Qara Dəniz Ticarət və İnkişaf Bankında Azərbaycan Respublikası üzrə təmsilçi direktor kimi fəaliyyət göstərir. 6 avqust 2021-ci ildə Azərbaycan Respublikasının Prezidenti İlham Əliyev tərəfindən maliyyə sahəsində uzunmüddətli səmərəli fəaliyyətinə görə "Şöhrət" ordeni ilə təltif olunub.
Ailəlidir və üç övladı var.
