90 saylı Ağdaş seçki dairəsindən deputatlığa namizəd Ümid Partiyasının sədri, eks millət vəkili İqbal Ağazadə iyunun 1-də təbliğat-təşviqat kampaniyası çərçivəsində Ağdaş rayonu Yenicə kəndində seçicilərlə ilk görüşünü keçirib.

Namizədin Seçki Qərargahından AzNews.az-a verilən məlumata görə, Yenicə kəndində qapı-qapı kampaniyası keçirildiyi vaxt İ. Ağazadə gözlənilmədən kampaniyaya qoşulub. Kənd mərkəzində olan seçicilər namizədlərini coşqu ilə qarşılayıblar. Namizəd əvvəlcə seçicilərin problemlərini dinləyib. Seçicilər bildiriblər ki, onun parlament fəaliyyətindən xəbərdardırlar və İ.Ağazadə həmişə xalqın problemlərini parlamentdə qaldırıb və onun həllinə çalışıb: “Bu səbəbdən ona etimad göstərir, Ağdaşın problemlərini parlamentdə qaldıracağına və həlli istiqamətində çalışacağına inanırlar. Elə seçicilərlə ilk görüşdə İqbal Ağazadənin rəqibi olan digər namizədin "Ağdaşlılar Ağdaşlını seçsin" seçki şüarını heçə endirib deyib ki, biz vətənimizi rayonlara, kəndlərə məhəllələrə bölmürük. "Ağdaşdan ağdaşlı seçilməlidir" deyimini yanlış və zərərli sayırıq.Vətəni hissə-hissə deyil, bütöv sevmək lazımdır. Harada Azərbaycan adı varsa, mən oralıyam. Mən qarabağlı, şəkili, naxçıvanlı, təbrizli, borçalılı, göyçəliyəm, nəhayət, həm də ağdaşlıyam”.

İ.Ağazadə daha sonra seçicilərin sualların cavablandırıb. Görüşdə iştirak edən seçicilər İqbal Ağazadəni sona qədər dəstəkləyəcəklərini və 18 iyunda ona səs verəcəklərini bəyan ediblər.

Qeyd edək ki, dünən Qaradeyin kəndində də İqbal Ağazadənin seçki qərargahı qapı-qapı təbliğat kampaniyası həyata keçirib. İ.Ağazadə övladına toy edən seçicilərdən birinin dəvəti ilə Qaradeyindəki toy ziyafətində iştirak edib və toyu olan gənclərə xoşbəxtlik arzulayıb. Qaradeyin seçiciləri də seçkidə İqbal Ağazadəni dəstəkləyəcəklərini bildiriblər. 

Seçki qərargahının qapı-qapı təbliğat kampaniyası və namizədin seçicilərlə görüşü davam edir.

  NUH.az