“Bizim partiya REAL hərəkatı ilə eyni siyasi blokda təmsil oluna və əməkdaşlıq edə bilər. REAL-la Azərbaycanda ortaq maraqlarımız olsa, bir yerdə fəaliyyət göstərə bilərik”.

Bu sözləri Modern.az saytına açıqlamasında Azərbaycan Demokrat Partiyasının (ADP) sədri Sərdar Cəlaloğlu deyib.

“Bizim üçün heç bir problem yoxdur. Əgər REAL da Azərbaycan maraqlarına xidmət edəcəksə, konkret olaraq məlum olacaqsa ki, hansı məsələlərdə əməkdaşlıq edəcəyik, o zaman bir yerdə fəaliyyət göstərə bilərik.
REAL-ın fəaliyyəti Azərbaycan xalqının və dövlətinin maraqlarına uyğun olacaqsa, mütləq şəklidə əməkdaşlıq edəcəyik”, - ADP sədri deyib.

REAL hərəkatının icra katibi Natiq Cəfərli Sərdar Cəlaloğlunun fikirlərinə münasibət bildirib:

O, deyib ki, bir yerdə əməkdaşlıq etmək üçün öncə Sərdar Cəlaloğlu dövlət maraqları, “xalqın yanında olmaq” kimi anlayışlara açıqlama gətirməlidir:

“Sərdar Cəlaloğlu və onun partiyası üçün “dövlət maraqları”, “dövlətçilik”, “xalqın yanında olmaq” nə deməkdirsə, öncə bunu açıqlasın. Mənim və bizim təşkilat üçün “dövlət maraqları” və “xalqın yanında olmaq” azad seçki, koorupsiyasız cəmiyyət və insan hüquqlarıdır. 
Əgər Sərdar Cəlaloğlunun dövlət maraqları ilə bizimki üst-üstə düşürsə, bir-birimizə yardım edə bilərik”.

Natiq Cəfərli deyib ki, Sərdar Cəlaloğlunun və digər partiya rəhbərlərinin təmsil olunduqları siyasi bloklar neçə illərdir uğursuz effekt verir:

“Sərdar Cəlaloğlunun rəhbəri olduğu siyasi partiya Azərbaycanda yaranmış ilk siyasi təşkilatlardan biri olmasına baxmayaraq, bu günə qədər təmsil olunduqları bloklarda və siyasi birliklərdə heç bir effekt əldə etməyiblər.
Dəfələrlə bunun şahidi olmuşuq ki, Azərbaycan cəmiyyətində siyasi bloklara və birliklərə münasibət heç də yaxşı olmayıb. Çünki son 10 ildə seçkilərdən qabaq və sonra yaranan siyasi hərəkat və birliklər nəticə olaraq dağılıb. Ona görə də ilk olaraq Azərbaycanda siyasi birliklərə yanaşma dəyişməlidir, yoxsa hansısa birliklərin yaradılması effektsiz olacaq”.

İcra katibi siyasi blokların şəxslər ətrafında deyil, yalnız ideyalar üzərində qurulduğu zaman uğurlu olacağına inanır:

“Siyasi blok və birliklər yalnız ideyalar üzərində qurulsa, uğurlu olacaq. Şəxslər ətrafında formalaşan siyasi bloklar nəticəsiz olacaq. Siyasi müstəvidə və əsl ideyalar üzərində blok və birliklər yaranarsa, REAL da Azərbaycandakı digər siyasi partiyalar kimi bu işlərdə iştirak etməyə hazırdır. Hələlik biz öz prinsip və proqramımızı elan etmişik.
Yeganə təşkilatıq ki, 3 ildən çoxdur məqsədlərə çatmaq istədiyimizi proqram şəklində yazıb ortalığa qoymuşuq.

Kim bizim proqram və dəyərlərlə razıdırlarsa, bunları dəstəkləyirlərsə, bizə bununla bağlı nə zaman müraciət etsələr bir yerdə təmsil oluna bilərik. Amma hələlik REAL-ın hansısa siyasi bloklarda təmsil olunmaq fikri yoxdur”.

 

  NUH.az