“Gülər Əhmədova və Hafiz Hacıyev bir-birilərinə çox yaraşırlar.

 

Gülər Əhmədova düzgün siyasi seçim edib və bu seçimində ona uğurlar arzulayırıq”.

Bu sözləri Modern.az saytına açıqlamasında hakim Yeni Azərbaycan Partiyasının (YAP) Mətbuat xidmətinin rəhbəri Hüseyn Paşayev keçmiş YAP- deputat Gülər Əhmədovanın Müasir Müsavat Partiyasına üzv olacağı haqqında yayılan məlumatlara münasibət bildirərkən söyləyib.

Partiya rəsmisi Gülər Əhmədovanın YAP-a və onun üzvlərinə qarşı irəli sürdüyü ittihamlara da cavab verib.

Hüseyn Paşayev Gülər Əhmədovaya uğurlar arzulayaraq bildirib ki, onun YAP-a və rəhbərlərinə qarşı irəli sürdüyü ittihamlar siyasi xal qazanmaq istəyi və atılan çamurdur:

“Əgər Gülər Əhmədova siyasətə qayıtmaq istəyirsə, buyurub qayıtsın. Amma onun köhnə partiya silahdaşlarını, YAP-ın üzvlərini nədəsə ittiham etməklə xal qazanmaq istəyi yersizdir.

YAP-ın ayrı-ayrı nüfuzlu şəxslərini yersiz tənqid və təhqirlə siyasət meydanına qayıtmaq istəyi mənasız və yersizdir. Bunların hamısı yanlış gedişlərdir. Biz bunu kənardan atılan çamur hesab edirik və YAP-a yapışmır.

Gülər Əhmədova artıq siyasi fəaliyyətini hansı siyasi partiyada davam etdirəcəyi ilə bağlı qərarını verib.

Yəqin ki,  düzgün qərar verib və seçimini edib. Sadəcə olaraq ona gələcək siyasi fəaliyyətində və həyatında uğurlar arzulaya bilərik.

Gülər xanım vaxtı ilə YAP-ın üzvü olub. Amma onun barəsində cinayət işi qaldırıldığına görə partiya təmsilçiliyindən uzaqlaşdırılıb. Haqqında cinayət işi açılmış şəxs partiya üzvü ola bilməz”.

Xatırladaq ki, keçmiş YAP-çı Gülər Əhmədova moderator.az-a açıqlamasında “ən çətin dövrlərdə belə, əqidəmi dəyişmədim. Lakin mənim ən çətin anımda bəzi partiyadaşlarım əllərindən gələn hər şeyi etdilər ki, məni əqidəmdən döndərsinlər. Zaman göstərdi ki, onlar səhv addım atdılar, ən çox dəstəyə ehtiyacım olduğu bir dövrdə məni meydanda tək buraxdılar. Bilmədikləri-bildikləri hər mövzuda danışdılar, hətta tənqidlə təhqiri də səhv salanlar oldu. Allahın bir görkü idi ki, Eldar Mahmudov olayına qarışanların içərisində YAP -ın Mərkəzi Nəzarət Təftiş Komissiyasının sədri belə, çıxdı. Məni bir anın içində az qala  ”xalq düşməni" elan edənlər YAP-ın bu qədər yüksək çinli funksionerinin belə bir çetenin içərisində olmağından qətiyyən “əsəbləşmədilər”, onun ünvanına  güldən ağır bir kəlmə işlətmədilər.

Bu məni də bir çoxları kimi  təəccübləndirdi. Açığı, bunu müxtəlif cür yozanlar oldu: Gülər Əhmədova  8 yaşlı oğlunun ad günündə həbs olundu, bütün ailə üzvləri işdən çıxarıldı, kiçik oğlumdan başqa bütün ailə üzvlərim şantaj olundu. Dövlət rəsmisinə qarşı şər atmadığım üçün başıma olmazın oyunlar gətirdilər. Böyük müsibətlər yaşadıq. Ölümümə belə, razı idim. Amma nə heç kimə şər atdım, nə də şantaja baş əydim. Əqidəmi ailəmin və özümün ən müsibətli günündə dəyişmədim. Əvəzində, bəzi partiyadaşlarım məni tez-tələsik partiyadan uzaqlaşdırmaq üçün əllərindən gələni etdilər. Mənim partiya biletimi ala bildilər. Gücləri buna çatdı. Əqidəmi inşallah, həyatımla birgə Allahıma təslim edəcəyəm”. 

 

  NUH.az