1994-cü ildə Murov-Kəlbəcər istiqamətlərində 14 fevral tarixində 1501 nəfərə yaxın vətəndaşlarımızın şəhid olduğu sosial şəbəkədə yazılmışdı. Mən fevral 1994-cü ildə Bakıdan – Gəncə şəhərinə getdim. Getməyimin səbəbi əslən İsmayıllı rayonundan olan bir xanımın Gəncə şəhərindən mənə (işlədiyim qurumun şəhər telefon nömrəsinə) zəng edərək, qardaşım əsgər Azadın ağır vəziyyətdə Gəncə şəhərində xəstəxanada ölüm-qalım həyatı ilə mübarizə apardığını bildirmişdi. Tanımadığım bu Azərbaycan xanımına minnətdarlığımı bildirirəm! Mən Gəncə şəhərində xəstəxananın qəbul şöbəsində olan zaman mənə bildirildi ki, xəstəxanaya yerləşdirilmiş yaralı əsgərlərin sayı çox olduğundan, qeydiyyat aparılması mümkün olmamışdır. Xəstəxananın böyük zalına keçib qardaşımı çarpayılarda axtarmağa başladım. Nəhayət çarpayıların birində ağır nərilti səsi ilə mənim adımın çəkildiyini eşitdim. Bundan sonra baxıb qardaşım Azərbaycan əsgəri Azadı tanıdım. Azad ilə söhbət edərək bədəninə baxdım. Çoxsaylı qəlpə yaralarının, dizin qəlpə zərbəsindən tamamilə dağıldığının, donmanın təsirindən ayaq və əl barmaqlarının qaralaraq funksiyalarının itirməsinin şahidi oldum. Bədənin arxasının qaşındığını və yanını qaşımağı Azad məndən xahiş etdi. Bədənin arxa tərəfini çevirərkən dəhşətli tərzdə qoxu məni vurdu. Dərhal həkimə müraciət etdim. Həkimlər sağolsun, tez xəstəyə baxış keçirməklə onun bədənin müəyyən mənada tibbi baxımdan təmizləməyə başladılar...

Qardaşım Azadın müalicə olunub, həyatda qalması məqsədilə onu Gəncə şəhərindən Bakı şəhərində yerləşən xəstəxanaya gətirdim. Bir neçə əməliyyatlar və amputasiyalar icra edildi. Azad 1-ci qrup əlil, 1-ci Qarabağ müharibəsi iştirakçısı və müharibə veteranıdır.

Həmin vaxt Azadın mənə dediklərindən!

Ağdam və Horadiz istiqamətlərində gedən döyüşlərdə döyüşən ordu tərkibində Azad vuruşmuşdur. Azadı iştirakçısı olduğu batalyon döyüşlər zamanı yaxşı nəticələr göstərmişdir. Həmin batalyon Kəlbəcər rayonu istiqamətinə vuruşa yönəldilib. Batalyon Daşkəsən rayonu ərazisindən Kəlbəcər rayonun istiqamətində döyüşlərə başlamışdır. Ordu hissələri (batalyon) Yanşaq kəndini keçməklə, Kəlbəcər rayonun Mərkəzi istiqamətində irəliləmişdir. Batalyon əmr əsasında geri qayıdıb! Murovdağ ərazisində ordu çoxsaylı itkilər vermişdir! Azad bir ayağının dizini qəlpə zərbəsindən itirdikdən sonra hərəkət edə bilməmişdir. Düşmənə əsir düşməmək üçün, öz avtomatından özünə atəş açmağa cəhd etmişdir. Avtomat donduğu üçün, bu hərəkətini Azad reallaşdıra bilməmişdir. Azadın yanında olan iki nəfər əsgər Azadı avtomatın kəmərinə keçirməklə uzun bir məsafədə buzlaşmış qarın üstündə sürükləyib hərbiçilərə məxsus olan yük maşınların birinə maşının kuzasına yerləşdiriblər. Həmin yük maşınlarında çoxlu əsgərlər olmaqla maşınlar Daşkəsən istiqamətində hərəkət edərkən, Azadın olduğu yük maşını buz yolda sürüşərək maşında olan bütün yaralı əsgərlər yerə qarın üstünə tökülmüşdür. Digər hərbiçilərin səyi nəticəsində yaralı əsgərlər ərazidən çıxarılıb “Toqanaya” çatdırılıblar!!!.

Bəli, 1994-cü ildə baş vermiş Kəlbəcər faciəsində döyüşən ordu tərkibində qardaşım Azad əsgər olaraq iştirak etmişdir. Tale belə gətirdi ki, həkimlər tərəfindən dəfələrlə müxtəlif cərrahiyyə əməliyyatlar edilməklə, Azadın həyatının davam etməsinə nail olduq. Müharibə dövründə aldığı xəsarətlərin nəticəsi və fəsadı olaraq, 2025-ci ilin fevralında Azad sağ ayağının “çanaq” hissəsini itirmək məcburiyyətində oldu. Ayağının çanağı əməliyyat edilməklə, ayağına “implant” yerləşdirilmişdir. Ümid edirəm 1994-cü ildən sonra keçirdiyi bütün cərrahiyyə əməliyyatlarda olduğu kimi Azad bu ağır sınaqdan çıxacaq!

Azad ilə əməliyyatdan sonra çəkdirdiyim foto şəkli paylaşıram.

Sonbeşik qardaşımız hərbiçi Araz ilə birlikdə veteranı ziyarət edərkən şəkli çəkdirmişik.

Allah müharibə veteranlarına kömək olsun, İnşAllah.

Azad, ad günün mübarək olsun!