UZAQ LİMANA MƏKTUBLAR - Bəsti Əlibəyli

ARKADAŞIM BÖCƏK

Getmək,

bu fani dünyadan

vaxtında çıxıb getmək.

Bir az da qumru kimi,

anadil kimi ötmək...

Orda, sükut evində

uyuyub dincini almaq,

bir az da başqa aləmin

sehrinə dalmaq.

Silkinib öncəki

gen yaddaşından,

ya bir tutam ot,

ya bir daş olmaq...

Əl-ələ, kürək- kürəyə

bir tənha böcəyə

arxadaş olmaq.

Getmək,

düşmənin yolundan,

dostun yadından

çıxıb getmək.

Atıb yükünü ilk Adamın,

bu son duracaqdan

son Adam kimi getmək...

Bəsti Əlibəyli