NUH.az-a  daxil olan məlumata görə, sabah, yəni 29.11.2024-cü il il tarixdə, saat 10:00-da Nərimanov  Rayon Məhkəməsində hakim Nərgiz Tağıyevanın sədrliyi ilə vəkil Adəm Məmmədovun   keçmiş  müvəkkili  Fidan Loğman  qızı  Abbasovaya  qarşı  “Şərəf və ləyaqətin, işgüzar nüfuzun müdafiəsi, dəyən mənəvi zərəri ödənilməsi” iddiası və 50 min manat  təzminat  tələbi ilə bağlı  işə baxılacaqdır.

Qısa xatırlatma  üçün qeyd edək ki, Fidan Abbasova bir neçə ildir SOCAR-ın sabiq vitse-prezidenti Mikayıl İsmayılovun  oğlu Orxan İsmayılzadəyə qarşı məhkəmə iddiası ilə çıxış edir.

Belə ki, Fidan Abbasova SOCAR-ın sabiq vitse-prezidenti  Mikayıl İsmayılovun oğlu Orxan İsmayılzadə ilə birgə uzun müddət  yaşayıblar və onların NİL adlı qızları var. Amma Orxan İsmayılzadə atalıqdan imtina edir və Nilin onun qızı olmadığını bildirir. Belə olan halda qarşı tərəf, yəni Nilin anası Fidan Abbasova məhkəməyə müraciət edərək  “Atalığın  müəyyən edilməsi”  tələbi ilə Orxan İsmayılzadənin DNT testindən keçməsini tələb edir. Və  bu iddia  ilə bağlı  2017-ci ildə  Sabunçu  Rayon Məhkəməsində  keçirilən məhkəmə prosesində  Adəm Məmmədov Fidan Abbasovanın vəkili  olub.

Qısa məlumat üçün  bu qədər.

Amma Fidan Abbasova öz vəkili  Adəm Məmmədovdan narazı qalıb  və bunu müxtəlif saytlara açıqlmasında qeyd edib.

Fidan Abbasova  öz açıqlamasında  vəkili  Adəm Məmmədova  10000 dollar ( on min ) verdiyini, Adəm Məmmədəovun isə qarşı  tərəfin xeyrinə çalışdığını, vəkili vasitəsi ilə ona saxta barışıq sənədi imzalatdıqlarını  və sonda qarşı tərəfin  öz öhdəliklərinə əməl etmədiyini bildirib.

Fidan Abbasovanın bu açıqlamaları  vəkil Adəm Məmmədovun narazılığına səbəb olub. Və buna görə Adəm Məmmədov  “Şərəf və ləyaqətin, işgüzar nüfuzun müdafiəsi, dəyən mənəvi zərəri ödənilməsi” iddiası ilə Nərimanov Rayon Məhkəməsinə müraciət edərək qarşı tərəfdən 50 min manat təzminat tələb edir.

Onu da qeyd edək ki, bu məsələyə ilk dəfə hazırlıq iclasında baxılanda  Fidan Abbasovanın vəkilləri aidiyyət məsələsini qaldırıblar. Belə ki, vəkil Adəm Məmmədov Fidan Abbasovaya qarşı şərəf və ləyaqətin alçaldılması üzrə iddianı Nərimanov Rayon Məhkəməsinə təqdim edib. Fidan Abbasova isə Xətai rayonu ərazisində qeydiyyatda olmaqla oradakı mənzilində yaşayır. Buna görə də iddiaya aidiyyəti üzrə Xətai Rayon Məhkəməsində baxılmalıdır. Hakim Nərgiz Tağıyeva vəkillərin etirazını əsaslı sayıb və iddiaya baxılması üçün Xətai Rayon Məhkəməsinə göndərilməsi barədə qərar qəbul edib.

Amma  və lakin, Adəm Məmmdəov  bu məhkəmə prosesini qanunsuz olaraq  yenidən Nərimanov Rayon Məhkəməsinə qaytarıb. Niyə ?

Fidan Abbasovanın bildirdiyinə görə, Adəm Məmmədovun bütün gücü-imkanları Nərimanov rayonunda cəmləşib. Yəni bu rayonda  istədiyi  qanunsuz qərarı qəbul etdirə bilər.

Beləliklə  uzun  fasilədən sonra  sabah, yəni 29.11.2024-cü il tarixdə, saat 10:00-da  vəkil Adəm Məmmədovun keçmiş müvəkkili  Fidan Abbasovaya qarşı iddiasına  hakim Nərgiz  Tağıyevanın  sədrliyi ilə  baxılacaq.

Sonda  Fidan Abbasova yenidən cənab Prezident İlham Əliyevə, Hüquq-mühafizə orqanlarının rəhbərlərinə, Ombudsmana, Ailə, Qadın və Uşaq Problemləri üzrə Dövlət Komitəsinə, Ali Məhkəmənin sədrinə, Məhkəmə-Hüquq Şurasının sədri İnam Kərimova, Prezident Administrasiyasının Hüquq-mühafizə orqanları ilə iş şöbəsinin müdiri Fuad Ələsgərova bir  ANA KİMİ   müraciət edərək  üzləşdiyi qanunsuzluqların aradan qaldırılmasına kömək etmələrini  xahiş edir.