Daş karxanasından, çınqıl sexindən vəzifəyə gələnlər..? 

Bəzi  icra başçılarının, yaxud deputatların tərcümeyi-halına nəzər salanda  adamı  soyuq  tər  basır. Daş karxanasında  çalışan  şəxsi   birdən-birə  Prezident Adminstrasiyasına  BAŞ MƏSLƏHƏTÇİ, oradan isə  hansısa  dövlət qurumuna  rəhbər təyin edirlər. Adam düşünür ki,  doğrudanmı, müstəqil dövlətin SİYASİ MİNBƏRİ öz  BAŞ MƏSLƏHƏTÇİSİNİ  daş-çınqıl  karxanasında axtarır..?

Sözün qısası, Milli Məclisin üzvü,  Qaçqınların və Məcburi Köçkünlərin İşləri üzrə Dövlət Komitəsi yanında  Məcburi Köçkünlərin Sosial İnkişaf Fondundunun direktoru  Mahir Abbaszadənin də tərcümeyi-halına baxanda adam eyni hissləri keçirir. Bakı Dövlət Universitetini iqtisadi nəzəriyyə müəllimi ixtisası üzrə bitirən  Mahir Abbaszadə Güzdəkdə daş karxanasında işləyib və sonra bank  müdiri olub. Daş karxanasından  gəlib bank müdiri olan, sonra deputat seçilən Mahir Abbaszadə qeyd edir ki, iqtisadiyyat  elmində 3 tezisin müəllifidir. 

Görəsən, Mahir Abbaszadənin müəllifi olduğu  bu 3  TEZİS nədən bəhs edir..? 

Mahir Abbaszadə  yazır ki,  1 elmi kitabın, 7 elmi məqalənin  müəllifidir. Görəsən, daş karxanasında  Mahir Abbaszadəyə səmadan vəhy gəlib, yoxsa bankda işləyəndə ilham pərisi çiyinə qonub..?  Böyük fizik Nyutonun  başına alma düşüb, o Ümumdünya Cazibə qanunun kəşf edib. Bəlkə daş karxanasında iraq olsun Mahir müəllimin başına  nəsə gəlib ki, bu boyda elmi kəşfləri edir...

Mahir Abbaszadə  xüsusi olaraq qeyd edir ki, hərbi zabitdir. Görəsən, Mahir Abbaszadə hərbi məharətindən ermənilərə qarşı  istifadə  edibmi..? 

Biz  Mahir Abbaszadənin  Laçında şəhid məzarı üstündəki hərəkətinə və  digər həssas məqamlara toxunmaq istəmirik. Biz  Mahir Abbaszadənin öz xanımına  ad günündə   420000 yevro dəyəri olan  hədiyyə bağışlamasına da diqqət ayırmırıq. Və belə məsələni müzakirə etmirik. Ancaq  Mahir Abbaszadənin  ölkə mediasında səs-küyə səbəb olan, qiymətli saatlarının manşet xəbəri olması ciddi məsələdir. Ağ və sarı qızıl, timsah naxışları, nə bilim briliyant qaşlar və s Ölkə mediası yazır ki, Mahir Abbaszadənin  saatı  18 əyar qızılından hazırlanıb, original PATEK FİLİPPE firmasının məhsuludur, su keçirməzdir, mexanik rejimlə işləyir, zərbəyə davamlı şüşəsi var, qiyməti də neçə 100  min...Bax, bu məsələnin ciddi müzakirəyə ehtiyacı var. Mahir Abbaszadə  deputat maaşı  və Məcburi Köçkünlərin Sosial İnkişaf Fondunun direktoru olaraq dövlətdən  konkret əmək haqqı alır. Görəsən, Mahir Abbaszadə  bu maaşla bu milyonluq sərvətlərə  necə sahib olub..?Mahir Abbaszadə, bütün normal ölkələrdə  məmurlar gəlir bəyyanaməsi  imzalayır, öz gəlirləri barəsində məlumat verirlər. Bizim məqsədimiz sənin pulunu saymaq deyil, məqsədimiz odur ki, bizim ölkədə sivil qanunlarla idarə olunsun. Sizin direktor oludğunuz  Məcburi Köçkünlərin Sosial İnkişaf Fondu ölkədə ən çox korrupsiyalaşmış qurumdur. Burada  saxta tenderlər yolu ilə dövlətin milyonları  mənimsənilir. Həm də siz hansı qabiliyyətinizə  və savadınıza  görə, bu ölkədə iki mühüm vəzifəni daşıyırsınız. Hələ vaxt tapıb  ELMİ YARADICILIQLA da məşğulı olursunuz.