Deputat Nəriman Əliyevin adı 300 minlik qalmaqalda… – TƏFSİLAT

Vətəndaşların hüquqlarının pozulması halları ilə dəfələrlə rastlaşmışıq. Bir çox hallarda bu məsələlər hüquqi müstəvidə həll edilir. Günahkarlar cəzalandırılır, hüquqları pozulmuş şəxslər isə qanunun yol verdiyin şəkildə müdafiə olunurlar. “Kivnews.com” İnformasiya Portalına yeni bir şikayət məktubu daxil olub. Masallı rayon sakini, hazırda Bakı şəhəri, Xətai rayonu, Xudu Məmmədov küçəsində yaşayan Rasim Rəfiyev adlı vətəndaş övladlarının başına gələn fakt barəsində danışdı.

Yazıya başlamamışdan öncə qeyd edək ki, söhbət 300 min manatdan gedir.

Şikayətçi Rasim Rəfiyev bildirdi ki, oğlu Fərhad Rəfiyev 2007-ci ildən “Karkas” avtomobil ehtiyyat hissələri dükanında satıcı vəzifəsində çalışıb. Daha sonra  isə “Karkas” mağazalar şəbəkəsinin adında dəyişiklik edilərək “Ştutqart” adı altında fəaliyyət göstərməyə başlayıb. Oxucularımızın nəzərinə çatdıraq ki, Mağazalar şəbəkəsinə Masallı rayonundan millət vəkili seçilmiş Nəriman Əliyevin bacısı oğlu Əfqan Abdullayev müdirlik edir. Amma millət vəkilinin adı rəsmi sənədlərdə qeyd olunmasa da, rəhbərlik kimi onun adı çəkilir.

Rasim Rəfiyev: “Bildirirəm ki, 2016-cı ilin dekabr ayının əvəllərində Əfqan Abdullayev oğluma bildirib ki, yanvarın 3-də rəhbərin (Nəriman Əliyevin) qızının toyudur, ayın 4-də isə sizin işdən çıxarılmanıza baxılacaq. Oğluma bildiriblər ki, guya dükana 200 min manat ziyan vurmusunuz. Bu xəbəri mən eşitdikdə, həmyerlim olan Əfqan Abdullayevin atasına zəng edərək, baş verənlərlə bağlı maraqlandım və onunla görüşmək istədiyimi bildirdim. 4 dekabr tarixində Əfqanın atası ilə evlərində görüşdüm və görüşə Əfqan Abdullayev də gəldi. Əfqandan oğlumun onlara nə ziyan vurduğunu soruşduqda, bildirdi ki: “Oğlanların bizə heç bir ziyan vurmayıb, əksinə mağazanın inkişafına, tanınmağına, böyük gəlirlər əldə etməsinə çalışıb”. Belə olduğu halda 200 min manat vəsaitin nə üçün tələb olunduğunu soruşdum. Əfqanın sözü belə oldu ki, “rəhbər tapşırıb 200 min al,  işdən çıxar və o cümlədən bundan sonra avtomobil ehtiyyat hissələrinin satışı ilə məşğul olmasınlar. Çünki bizim rəqibimiz ola bilərlər. Olacaqları halda buna imkan verilməyəcək. Çünki güc biz tərəfdədir”.

Vətəndaş qeyd edir ki, dekabrın 6-da Nizami Rayon Polis İdarəsinin iki əməkdaşı oğlunun yaşadığı Nəsimi rayonu Asif Məhərrəmov 33 B, mənzil 15 ünvanına gələrək oğlu Fərhad Rəfiyevi özləri ilə Polis İdasəsinə aparıblar: “Qeyd edim ki, oğlumun Polis İdarəsinə çağırılması ilə bağlı əvvəlcədən heç bir dəvət olunmayıb.Oğlum Polis Idarəsinə aparıldığı ilə bağlı mənə məlumat verəndə Nizami Rayon Polis İdarəsinə getdim. İlk əvvəl belə bir adamın idarəyə gətirilmədiyini bildirdilər, sonra isə məlum oldu ki, oğlum İdarənin 303-cü otağındadır. Və məni də ora dəvət  etdilər. Yüksək rütbəli polis zabiti (mülki geyimli polis nəfərlərindən birinin adı Mehrac idi) mənə bildirdi ki, Əfqan Abdullayevin tələb etdiyi 300 min manat ödənilməlidir. Əks halda bu şikayət sənədləşəcək və bu halda oğlunuz barəsində 8 ildən 12 ilə kimi iş gözlənilir. Sənədləşəndən sonra pul ödənilsə belə, yenə cinayət işi açılacaq. Hətta Polis İdarəsinin 303-cü atağında Əfqan Abdullayev bildirdi ki, “polisə müraciət etməmişdən öncə qoyulan 24 saat ərzində 200 min manat ödənilmədiyindən rəhbərlik (Nəriman Əliyev) tələb edib ki, bu gün məbləğ 300 min manat olmalıdır”.

Şikayətçi Rasim Rəfiyev qeyd edir ki, oğlunun günahı olmadan şərlənərək Polis İdarəsinə gətirilməsini və orada onun səhətinin pisləşdiyini görərək, əlacsız qaldığından onların dediyi ilə razılaşıb: “Bildirdim ki, ödəniləcək məbləğə görə evimi və avtomobilimi verməyə hazıram. Bundan sonra Xətai rayonunda yerləşən ASAN Xidmət mərkəzinə gedərək oğlumun 109 kvadratlıq evini və avtomobillərimi onların adına keçirtdik. Qeyd edim ki, bu zaman nə əldən ələ, nə bank yolu ilə pul edənildi. Hansısa formada qəbz yazılaraq sənədlərə əlavə edildi. Alqı-satqı ilə bağlı bizə heç bir sənəd təqdim olunmadı”.

onda qeyd edək ki, surəti “Kivnews.com” İnformasiya Portalına göndərilən şikayət ərizəsinin əsli Azərbaycan Respublikasının Prezidenti  İlham Əliyev cənablarına, Heydər Əliyev Fondunun Prezidenti  Mehriban xanım Əliyevaya, Azərbaycan Respublikasının Baş  prokuroru Zakir Qaralov cənablarına,  Azərbaycan Respublikasının Daxili işlər naziri Ramil Usubov cənablarına, Azərbaycan Respublikasının Bakı şəhər prokuroru Əziz Seyidov cənablarına, DİN-nin Baş Mütəşəkkil Cinayətkarlıq  Mübarizə İdarəsinə,  Milli Məclisin sədri Oqtay Əsədov cənablarına ünvanlanıb.

Rasim Rəfiyev: “Cənab prezident, hesab edirəm ki, Masallı rayon sakini Əfqan Abdullayev və onun rəhbərim deyərək müraciət etdiyi şəxs millət vəkili Nəriman Əliyev bizim hüquqlarımızı pozmuşdur. Çünki oğlum mağazada satıcı işlədiyi halda bu qədər vəsaiti mənimsəyə bilməzdi. Digər tərəfdən də, yuxarıda qeyd etdiyim ki, Əfqan Abdullayevin özü də etiraf etmişdi ki, oğlum Fərhad Rəfiyev onlara heç bir ziyan vurmayıb. Sadəcə olaraq, Əfqan Abdullayev rəhbərinin əsassız göstərişini yerinə yetirərək bizə küllü miqdarda ziyan vurmuşdur. Bir ata kimi, sizdən xahişim ondan ibarətdir ki, başıma gələnlərlə bağlı obyektiv araşdırma aparılmasına göstəriş verəsiniz. Və mənzilin, avtomobillərin ailəmə qaytarılmasına yardımçı olasınız”.

“Kivnews.com” İnformasiya Portalı olaraq “Ştutqart” mağazalar şəbəkəsinin müdiri Əfqan Abdullayevin sonu XXX XXX -22-72, o cümlədən “Ştutqart”ın saytında göstərilən mərkəzi ofisin 012-565-32-42 saylı telefonlarına dəfələrlə zəng vursaq da, zənglərimizə cavab verən olmadı. Əməkdaşımız əlacsız qaldığından mərkəzi ofisin satış menecerlərinin 055-790-27-07 telefon nömrəsi ilə əlaqə yaradaraq özünü Əsəd müəllim kimi təqdim edən şəxslə danışaraq, Əfqan Abdullayevlə danışmaq istədiklərini bildiriblər. Qarşı tərəf bu barədə Əfqan Abdullayevə məlumat veriləcəyini bildirməklə, əməkdaşımızın əlaqə nömrəsi də götürüb. Bir neçə gün gözləsək də, qarşı tərəfdən heç bir cavab gəlmədi. Amma istənilən halda qarşı tərəfin mövqeyini dərc etməyə hazırıq.

“Kivnews.com” İnformasiya Portalı