İqtisadi və sosial inkişaf yanbayan getməlidir - Millət vəkili Əli Məsimli

Birincisi,keçən il ümumi daxili məhsul 4 faizdən çox artıb. Qeyri-neft sektorunda artım 6 faizdən çox olub. Bütün bunlar onu deməyə əsas verir ki, biz iqtisadi sahədə dayanıqlı inkişafa nail ola bilmişik və bu il və gələn illərdə bu dinamika saxlanılacaq.

İkincisi, keçən il biz maliyyə vəziyyətimizi böyük dərəcədə yaxşılaşdıra, öz rezervlərimizi artıra bilmişik. İl ərzində valyuta ehtiyatlarımız təqribən 5 milyard dollardan çox artıb və bu gün bu rəqəm 72 milyard dollara bərabərdir.Adambaşına düşən valyuta ehtiyatları göstəricisinə görə Azərbaycan dünyada aparıcı ölkələrin sırasındadır.

Üçüncüsü,Azərbaycann xarici borcu ümumi daxili məhsulumuzun cəmi 7.2 faizini təşkil edir. Valyuta ehtiyatlarımız xarici borcumuzu 14 dəfə üstələyir. Bütün bunlar deməyə əsas verir ki, iqtisadiyyat öz resurslarına söykənir. Halbuki biz indi xarici borcumuzu bir qədər artırmaq üçün də səylər göstərməyə başlamışıq. Xarici maliyyələşmə bizə nə verəcək? Nəzərə alsaq ki, ölkə qarşısında duran bir çox ciddi investisiya tələb edən məsələ var, bu, büdcə yükünü bir qədər azaldacaq. Ona görə, nəzərə alsaq ki, bizim xarici borcumuzun ödəmə qrafiki də təsbit edilib və bu gün 5.2 milyard dollara bərabər olan xarici borcumuz illər keçdikcə daha da azalacaq. Ona görə əlavə maliyyə resurslarının cəlb edilməsi məqsədəuyğun sayıla bilər və artıq hökumət bu istiqamətdə fəaliyyətə başlayıb.

Dördüncüsü, büdcə parametrləri hər bir ölkənin iqtisadi potensialını əks etdirir:həm parametrlər, həm dinamika... Bu ilin büdcəsi rekord səviyyədədir. Büdcə xərcləri 41 milyard manatdan çoxdur.İcmal büdcə isə 48 milyard manatı ötüb. Biz buna yalnız daxili resurslar hesabına nail olmuşuq. Hər bir ölkənin siyasi müstəqilliyi onun iqtisadi müstəqilliyindən asılıdır. Yəni, iqtisadi cəhətdən, maliyyə məsələləri cəhətindən əgər heç kimdən asılı deyilsənsə, sən müstəqil siyasət apara bilərsən.Bütövlükdə, əlbəttə ki, bir çox digər parametrlər də var. Amma əsas iqtisadi göstəricilər bundan ibarətdir.Təbii ki, bu, bizə imkan verir ki, sosial proqramları daha fəal icra edək.

Beşincisi, bu il yanvarın birindən minimum əməkhaqqı orta hesabla 14-15 faiz artıb. Bu qədər böyük sərmayə qoyan və Qarabağın bərpası kimi qarşımızda bu qədər böyük problemi olan ölkədə bu sahəyə də bu diqqəti yetirmək,bizim siyasətimizin mahiyyətini göstərir.Azərbaycan vətəndaşları ildən-ilə daha yaxşı yaşamalıdırlar.Hər şey cəmiyyətdə də,siyasətdə də, ailədə də ədalətli olmalıdır.İmkan yarandıqca, biz ilk növbədə, bu sahəni də diqqətdə saxlamışıq. Bundan sonra da sosial və iqtisadi inkişaf yanbayan gedəcək.İqtisadi imkanlar artdıqca biz daim sosial məsələlərin həllinə-minimum əməkhaqqı, pensiya, sosial müavinətlərin artırılması məsələlərinə də daim diqqət göstərəcəyik.

Azərbaycan Prezidentinin yanvarın 7-də yerli televiziya kanallarına müsahibəsinin iqtisadi və sosial məqamları- 2024-cü ildə nail olunan yüksək artım tempinin növbəti illərdə də qorunub saxlanılması və bu əsasda sosial problemlərin həllinin iqtisadi bazasının və maliyyə resursları imkanlarının genişləndirilməsi,iqtisadi və sosial inkişafın yanbayan getməsinin təmin edilməsi,sosial problemlərin,xüsusən də aztəminatlı təbəqənin problemlərinin həllinin sürətləndirilməsi və sair bu kimi məsələlər hökumət və onun aidiyyatı orqanları qarşısında yeni vəzifələr qoyur.Həmin vəzifələrin optimal müddətdə hərtərəfli həllinin magistral yolu struktur,institusional və sair bu qəbildən olan zəruri islahatlar da daxil olmaqla,cəmiyyət həyatının bütün sahələrində sistemli islahatların davamlı olaraq dərinləşdirlməsi və genişləndirilməsindən keçir.