Dünyanın ən yaşlı timsahının neçə yaşı var? - 10 mindən çox nəslin ATASI - VİDEO

"Henri" təxminən 123 yaşında olan dünyanın ən yaşlı timsahıdır. Son bir neçə onillikdə o, minlərlə nəslin atası olub. Qaynarinfo bu barədə "IFL Science" jurnalına istinadən xəbər verir. İllər keçdikcə "Henri" nəhəng ölçülərə çatıb. Bu timsah burnundan quyruğuna qədər 5 metrdən çox uzanır və 700 kiloqram ağırlığındadır. Müqayisə üçün qeyd edək ki, Nil timsahı orta hesabla 4,5 metrə qədər böyüyür və təxminən 410 kiloqram ağırlığındadır. Adına baxmayaraq, bu növ Afrikanın əksər hissəsində tapıla bilər. 1985-ci ildən bəri yaşadığı Cənubi Afrikadakı "Crocworld Conservation Center"in məlumatına görə, "Henri"nin təxminən 1900-cü ildə Botsvanadakı Okavanqo deltasının bataqlıqlarında anadan olduğu güman edilir. "Crocworld"ə gəldikdən sonra "Henri" ən azı 6 dişi ilə cütləşib. 40 ildən az müddətdə 10 000-dən çox övlad sahibi olduğunu gözətçilərinə hesablamağa imkan verib. Onun doğum günü dekabrın 16-da qeyd olunur. Buna görə də bu qış "Henri"nin 124 yaşı tamam olacaq. Lakin vəhşi təbiətdə doğulduğu üçün onun dəqiq doğum tarixi məlum deyil. İngilis televiziya şousu "Croc Killer" "Henri"nin 1903-cü ildə tələçi ser Henri tərəfindən tutulduğunu, buna görə də adının belə olduğunu bildirib. Lakin bu hekayə "Crocworld" saytında timsahın ömrünün çox hissəsini Okavanqo deltasında keçirdiyini bildirən məlumatla uyğun gəlmir. "Öz mənşəyindən asılı olmayaraq, "Henri" şübhəsiz ki, möhtəşəm bir heyvandır. O, indiki yaşayış yerini 90 yaşında olduğu təxmin edilən "Colgate" adlı başqa bir qoca timsahla bölüşür", deyə "IFL Science" yazıb. Qəzet timsahların "əsirlikdə" 100 ilə qədər yaşaya biləcəyini qeyd edib, lakin bəzi elm adamları bu heyvanların müəyyən dərəcədə ləng qocalma göstərə biləcəyini irəli sürürlər. Onların fikrincə, nəzəri olaraq, timsahlar qocalıqdan ölmürlər, yalnız aclıq, bədbəxt hadisələr və ya xəstəliklər kimi xarici amillərə tab gətirirlər. Bununla belə, timsahların ölümsüz olduğunu düşünmək səhv olar. Bir çox amillər onların dözümlülüyü ilə bağlıdır, lakin bəzi tədqiqatlar bunun timsahların bağırsaqlarında yaşayan mikroorqanizmlərlə bağlı ola biləcəyini göstərir. "Bağırsağın mikrobiomunun ev sahibinin fiziologiyası üçün əhəmiyyətini nəzərə alaraq, biz fərz edirik ki, timsahın bağırsaq mikrobiomu və yaxud metabolitləri onun dayanıqlılığına və uzunömürlülüyünə töhfə verən maddələr istehsal edir", deyə tədqiqatçılar bildirib.