Nazarbayevin bacısı 10 min dollara satır ....

Qazaxıstan parlamentinin deputatı Nartay Aralbayuli bildirib ki, Almatıdakı “quş bazarı”nın ticarətçiləri Nursultan Nazarbayevin bacısının konteynerləri 10 min dollara satmasından şikayətlənirlər. 

Musavat.com Qazaxıstan mediasına istinadla xəbər verir ki, deputat ticarətçilərin indi bir yerə iki dəfə pul ödəməyə məcbur olduqlarını bildirib.

Aralbayuli qeyd edib ki, tacirlər məktublarında Kenjehan bazarının Anipa Nazarbayevaya məxsus olduğunu vurğulayıblar.

“Bazar alverçilərindən alınan ifadələrə görə, Kenjehan bazarının son 10 ildə sahibi Anipa Abişovna Nazarbayeva olub. Onun adamları bazarda hər konteyneri 10 min ABŞ dollarına satıblar. Lakin onlar alqı-satqı müqaviləsi təqdim etmir, sadəcə konteynerə pasport verirlər. Müqavilə bağlamaqda israr edənlərə deyirlər ki, onlar bazara əbədi nəzarət edəcəklər. Alverçilərin dediyinə görə, bazarda 1000-ə yaxın konteyner var”.

İndi bazar payı başqa bir şirkət tərəfindən ələ keçirilib və o, tacirlərdən yer üçün əlavə pul ödəməyi tələb edir.

“Məlumata görə, 4 aprel 2022-ci il tarixində Kenjehan bazarının 100%-i Mitra Consulting LLP və vətəndaş E.M.Rozenberqə verilib. Bazarın 640 milyon tengeyə satıldığı bildirilir. Bazarın yeni sahibləri ticarətçilərdən 325 min tengeyə konteyner almağı tələb edirlər. Belə olanda ticarətçilər bir yerə görə iki dəfə ödəniş etmək məcburiyyətində qalırlar. Bundan əlavə, onlardan notariat xidmətlərinə və konteyner sahiblərinə aylıq 50 min tenge ödəmək tələb olunur”, - deyə o əlavə edib.

Deputat qeyd edib ki, ticarətçilər artıq ödədikləri pulun geri qaytarılmasını tələb edirlər.