Tədbirdə Qarabağ müharibəsi qəhrəmanları, iş adamları iştirak edib...
Balakən rayonunun Qabaqçöl qəsəbəsində Azərbaycan-Avar İctimai Birliyinin sədri Məhəmməd Nooyevin rəhbərliyi altında iş adamlarının dəstəyi ilə əslən Balakən rayonundan olan II Qarabağ Vətən müharibəsinin qəhrəmanları Ramazan Hudulov, Fərid Əliyev və digər zabit və qazilərin iştirakı ilə 2021-ci ildə ali məktəblərə daxil olmuş bir qrup gənclərlə görüş keçirilmişdir.
Görüşdə öncə Qarabağ müharibəsində həlak olmuş şəhidlərimizin xatirəsi bir dəqiqəlik sükutla yad edilmişdir.
Tədbiri açan Birliyin sədri Məhəmməd Nooyev 44 günlük Vətən Müharibəsində qəhrəmanlıq göstərmiş zabitlərimizin, əsgərlərimizin keçdiyi şərəfli həyat yolundan danışmış və qazilərimizə sağlam ömür diləmişdir.
Sonra Vətən Müharibəsi qəhrəmanları Ramazan Hudulov, Fərid Əliyev və zabit yoldaşları keçdikləri şərəfli yoldan danışmışlar. Çıxış edənlər 2021-ci ildə ali məktəblərə yeni daxil olmuş bir qrup tələbələri təbrik etmiş, onlara gül və hədiyyələr vermiş və təhsildə uğurlar arzulamışdır. Tədbirdə iş adamları Musa Dibirov, Hacı Dibirov, Şaban Eminov və digərləri çıxış edərək qazilərimizə, zabitlərə və tələbələrə uğurlar arzulamışlar.
Yeni tələbə adını qazanan gənclər diqqət və qayğıya görə, tədbirin təşkilatçılarına təşəkkürlərini bildiriblər. Tədbir vətənə həsr olunmuş musiqi və mahnı ifaları ilə yekunlaşmışdır.
