Ermənistan bu razılaşmanı imzalamaqla Azərbaycanın bütün şərtlərini qəbul etmiş oldu

Azərbaycan, Rusiya və Ermənistan arasında Dağlıq Qarabağ münaqişəsinin tənzimlənməsinə dair bəyanat Azərbaycanın böyük qələbəsidir və milli maraqlarımıza tam cavab verir.

Bunu Trend-ə Milli Məclisin deputatı Afət Həsənova deyib.

Deputat bildirib ki, bu bəyannamənin imzalanmasının ən birinci mühüm əhəmiyyəti ondan ibarətdir ki, 30 ildir pozulmuş ərazi bütövlüyümüz bərpa olunur:

“Bəyannaməyə əsasən işğalçı qüvvələr torpaqlarımızdan çıxarılır. Ermənistan bu bəyannaməni imzalamaqla Azərbaycanın bütün şərtlərini qəbul etmiş oldu. Döyüşlər başlayan ilk vaxtlardan etibarən cənab Prezident İlham Əliyev bildirmişdi ki, Ermənistan işğal edilmiş Azərbaycan ərazilərindən çıxacağı barədə konkret qrafik təqdim edərsə, döyüşlər dayandırıla bilər. Lakin o zaman Ermənistan tərəfi belə bir qrafik haqqında bir kəlmə də dilinə gətirməmişdi və ancaq bu bəyannamədə Azərbaycanın şərtlərinə uyğun olaraq işğalçı qüvvələrin ərazilərimizdən tam olaraq çıxması barədə konkret qrafik əksini tapıb.

Sənəddə digər vacib məqamlardan biri odur ki, Dağlıq Qarabağa hər hansı bir status verilməsindən söhbət getmir. Əgər əvəllər Dağlıq Qarabağa ən yüksək statusun verilməsi nəzərdə tutulurdusa, bu gün ordumuzun döyüş meydanında əldə etdiyi uğurlar vəziyyəti dəyişib, Dağlıq Qarabağa hər hansı statusun verilməsindən söhbət getmir.

Həmçinin bəyannamənin mühüm əhəmiyyətindən biri də Naxçıvanın blokadasına son qoyulur, Naxçıvan ilə Azərbaycanın əsas hissəsi arasında kommunikasiya, rabitə yaradılması və onun təhlükəsizliyinin təmin olunması öhdəliyi götürülür. Ümumilikdə sənəddə Azərbaycan üçün ən fundamental məsələlər öz həllini tapıb. Bu da ondan ibarətdir ki, Dağlıq Qarabağ Azərbaycanın tərkib hissəsidir, qan tökmədən Laçın, Kəlbəcər və Ağdamın yerdə qalan hissəsi Azərbaycana qaytarılacaq və orada bir nəfər də erməni əsgəri qalmayacaq, yəni işğalçı ordunun Azərbaycan ərazisində mövcudluğuna son qoyulur”.