"İsa peyğəmbər ağdərili olmayıb" – İngilis kilsəsinin rəhbəri

Moderator.az-ın məlumatına görə, ingilis kilsəsinin rəhbəri Castin Uelbi öz Twitter səhifəsində İsa Məsihin ağdərili olmadığı barədə paylaşım edib. Castin Uelbi deyib ki, xristianların əksərinin Həzrət İsanı ağdərili adam kimi təsəvvür etməsi, əslində, zaman-zaman dini mövzularda çəkilən rəsmlərin təsirinin nəticəsidir. İngilis kilsəsinin rəhbəri xaçpərəstləri rəssamların təsvirlərinə uymamağa səsləyib və belə yazıb: "İsa Yaxın Şərqdə yaşayıb. O, ağdərili olmayıb. Biz bunu hər zaman, hər gün xatırlamalıyıq. Bu çox vacibdir". 

Qeyd edək ki, arxiyepiskopun bu açıqlamasından az əvvəl keçmiş pastor,  "Black Lives Matter" hərəkatının fəalı Şon Kinq Həzrət İsanı avropalı kimi təsvir edən bütün heykəllərin götürülməsini təklif etmişdi. Bir neçə il öncə isə Amerikanın bəzi din xadimləri və teoloqları yəhudilərin xilaskarı Musa peyğəmbərin zənci, hətta həbəşi olması ehtimalının çox ağlabatan olduğunu söyləmişdilər.